Salè ak Avantaj

An jeneral, Lwa sou Prensip Travay ki Jis (Fair Labor Standards Act, FLSA) la mande pou konpayi yo bay poz rezonab pou yon anplwaye tire lèt pou bebe yo ki nan alètman an pandan yon ane apre yo fin akouche chak lè anplwaye sa a bezwen tire lèt. Kantite fwa ak kantite tan poz yo bezwen pou yo tire lèt la ap varye tou depan de eleman ki gen rapò ak anplwaye k ap fè alètman an ak timoun nan. Eleman tankou kote espas la ye ak etap ki nesesè yon fason rezonab pou yo tire lèt nan tete yo, tankou prepare ponp lan, ka gen enpak sou tan anplwaye a ap bezwen pou l tire lèt la.

Anplwaye ki travay a distans yo kalifye pou yo pran poz pou yo tire lèt dapre FLSA sou menm baz ak lòt anplwaye yo.

Anplwaye ki konsène sa yo ap jwenn “yon kote, ki pa yon twalèt, ki bare pou moun pa wè e kote kòlèg yo ak piblik la p ap ka annik antre, kote anplwaye a ka itilize pou yo tire lèt nan tete yo.” Dapre FLSA a, yon twalèt, menmsi l prive, pa yon kote ki apwopriye pou konpayi a bay pou moun tire lèt tete.

Dapre FLSA a, lè yon anplwaye ap itilize poz li nan travay la pou l tire lèt tete l, li:

• Dwe pa gen okenn travay l ap fè; oswa
• Dwe touche pou tan poz la.

Met sou sa, lè konpayi yo bay poz peye, yon anplwaye ki itilize poz sa a pou l tire lèt tete l dwe touche menm jan ak anplwaye yo peye pou poz yo.